होली पर्व र प्रतिनिधिसभा निर्वाचनलाई लक्षित गर्दै रौतहट प्रशासनको अत्यन्त जरुरी सूचना जारी

रौतहट, १२ फागुन / आगामी फागुन २१ गते हुने प्रतिनिधिसभा सदस्य निर्वाचन २०८२ तथा होली (फागु) पर्वलाई मध्यनजर गर्दै जिल्ला प्रशासन कार्यालय रौतहट ले अत्यन्त जरुरी सूचना जारी गरेको छ। निर्वाचनको सुरक्षा संवेदनशीलता तथा निर्वाचन आचारसंहिताको पूर्ण पालना सुनिश्चित गर्न प्रशासनले राजनीतिक दल, उम्मेदवार, मतदाता तथा सर्वसाधारण सबैमा संयमित र जिम्मेवार व्यवहार गर्न आग्रह गरेको हो। जिल्ला प्रशासन कार्यालयले जारी गरेको सूचनामा निर्वाचन प्रचार–प्रसार तथा मौन अवधिमा शान्ति, सुव्यवस्था र सौहार्दपूर्ण वातावरण कायम राख्न विशेष ध्यान दिन आग्रह गरिएको छ। होली पर्व धार्मिक तथा सांस्कृतिक दृष्टिले महत्वपूर्ण रहेकाले मर्यादित, सभ्य र अनुशासित रूपमा मनाउन प्रशासनले अपिल गरेको छ।

आचारसंहिता पालना सम्बन्धमा

प्रशासनले निर्वाचन आचारसंहिता २०८२ को पूर्ण पालना गर्न निर्देशन दिएको छ। आचारसंहिता उल्लंघन भएको पाइएमा सम्बन्धित निकायलाई जानकारी गराउन तथा कानुनी कारबाही प्रक्रिया अघि बढाइने उल्लेख गरिएको छ।त्यसैगरी, भीडभाड हुने कुनै पनि कार्यक्रम आयोजना गर्नुअघि जिल्ला प्रशासन कार्यालयबाट अनिवार्य अनुमति लिनुपर्ने जनाइएको छ। अनुमति बिना कुनै पनि मेला, सभा वा जुलुस नगर्न प्रशासनले स्पष्ट पारेको छ।

पर्व मनाउने सम्बन्धमा

होली पर्व एकता, सद्भाव र भाइचाराको प्रतीक भएकाले आपसी सहमतिमा मात्र पर्व मनाउन आग्रह गरिएको छ। कसैको इच्छा विपरीत जबरजस्ती रङ दल्ने, लोला हान्ने, फोहर छ्याप्ने जस्ता गतिविधि नगर्न चेतावनी दिइएको छ।विशेषगरी निर्वाचन सुरक्षामा खटिएका सुरक्षाकर्मी, कर्मचारी तथा सर्वसाधारणलाई लक्षित गरी कुनै पनि प्रकारको अवाञ्छित व्यवहार नगर्न आग्रह गरिएको छ। यस्ता कार्य कानून विपरीत मानिने र कारबाहीको दायरामा पर्ने प्रशासनले जनाएको छ।

सवारी साधन र सार्वजनिक शान्ति कायम गर्ने सम्बन्धमा

प्रशासनले मादक पदार्थ सेवन गरी सवारी साधन नचलाउन, ट्राफिक नियमको पालना गर्न तथा सार्वजनिक स्थानमा होहल्ला नगर्न आग्रह गरेको छ। अत्यधिक ध्वनि प्रदूषण हुने गरी डिजे वा चर्को आवाजमा बाजा बजाउने कार्य पनि नगर्न निर्देशन दिइएको छ।सार्वजनिक शान्ति भंग हुने कुनै पनि गतिविधि नगर्न तथा समाजमा असहज अवस्था सिर्जना हुने कार्यबाट टाढा रहन प्रशासनले सबैलाई अनुरोध गरेको छ।सूचनामा उल्लेख भएअनुसार, कसैले कानुन विपरीत कार्य गरेको पाइएमा प्रचलित कानुन बमोजिम कडा कारबाही गरिनेछ। निर्वाचनको संवेदनशीलतालाई ध्यानमा राख्दै सुरक्षा निकायहरू उच्च सतर्कतामा रहेको प्रशासनले जनाएको छ।

समग्रमा, होली पर्व र प्रतिनिधिसभा निर्वाचन एकै समयमा परेकाले शान्ति, सुरक्षा र आपसी सद्भाव कायम राख्नु सबैको साझा दायित्व भएको प्रशासनको भनाइ छ। जिल्लावासीलाई संयमित, जिम्मेवार र कानुनसम्मत व्यवहार गर्न अपिल गर्दै प्रशासनले निर्वाचनलाई स्वतन्त्र, निष्पक्ष र शान्तिपूर्ण वातावरणमा सम्पन्न गराउने प्रतिबद्धता दोहोर्‍याएको